DÁMOSTE LA BIENVENIDA A LA UNIVERSIDÁ PA GUAH.ES
¿Préstate xugar? ¿Y los esperimentos? ¿¿Sí?? ¡Pos esti ye’l to llugar! Dende la Universidá pa guah.es, un proyeutu de la Universidá d’Uviéu al que-y abluca la ciencia y encánta-y averarla a neños y neñes como tú, proponémoste….
faer un LLABORATORIU DE COLOR
¿Cómooo? -Taréis quiciabes pensando- ¡Pero si yo nun tengo nengún llaboratoriu nin soi científicu o científica!
¿Sabéis una cosa? La ciencia ta en tooooes partes y, ensin danos cuenta, facémosla en bien de actividaes del nuesu día a día, sobremanera… ¡cuando xugamos! Y ye que la llevamos dientro!
Y como el xuegu ye tan importante y la ciencia presta tantu, equí te proponemos… ¡xugar y esperimentar! Nesta páxina vamos emponete un mizcu sobro cómo faelo.
Embaxo vas ver qu’hai trés “secciones”. Dientro de caúna d’elles vas atopar un vídeu nel que te vamos dir cuntando tou adulces. Na primer sección vas atopar una pequena introducción na que nos presentaremos a nós y l’actividá. Na segunda y tercer sección pondremosnos… ¡a faer ciencia!, amosándote la propuesta Amiestos de colores, onde vamos faer amiestos, creaciones artístiques sobro material más o menos absorbente, etc. A lo último, en Colores a la carrera, los colores van entamar a correr, anque quiciabes nun toos son igual de rápidos y van tener que dixebrase…
¿Apetezte? Pos acompáñanos nesta aventura científica, na que vas atopar material de llaboratoriu real col qu’esperimentar, ciencia, arte y …. ¡munches más sorpreses!
LLaboratoriu de color
¿Qué ye la universidá? ¿Qué ye la Universidá pa Guah.es? ¿Qué ye lu que vamos facer?
¡Cuántas entrugues! Si quies, nel siguiente vídeu, vas poder resolver estes duldes… ¡y conocenos!
Sección 2: Amiestos de colores
Los colores arródiennos, podemos atopalos nos oxetos, nes partes del nuesu cuerpu, si nos asomamos a la ventana na cai, ¡podemos atopar bien de ellos! Paecen xugar, entemecese y formar otros nuevos.
Güei prestaríanos que formases parte d’ese xuego con colores, afayando, esperimentando y esquizándolos traviés de los amiestos. A partir de el colores primarios (azul, maxenta y mariellu) y con ayuda del material que t’apurrimos, vas poder crear un pequenu llaboratoriu nel que van surdir nuevos colores… ¡como por arte de ciencia!
¿Qué precisamos?
Del sobre…
- Botecinos d’acuareles líquides
- Pipetes
- Bandexa de amiestos
- Bastoninos
- Algodones
- Papel de filtru
Y amás…
- Materiales con distintu grau d’absorción: papel, cartulina, papel d’acuarela, pañales, papel absorbente… ¡cualquier cosa que te asoceda y que tengas per ahí!
¿Qué ta pasando?
¿Prestáronte los amiestos de colores? ¿Consiguisti faer munchos nuevos? De xuru, salieronte colores bien guapos, pero ¿cómo los fiximos?
Ensin danos cuenta, realicemos un amiestu bien especial, fiximos una disolución. Una disolución ye un tipu d’amiestu homoxéneo na que nun podemos estremar los sos componentes, “xúntense” perfeutamente. Por casu, al faer el color verde, yá nun podemos estremar los colores que lu componen, l’azul y el mariellu.
Na nuesa cocina, que bien paez un llaboratoriu, faemos infinidá de disoluciones y amiestos. Por casu, si echo azucre a l’agua y remuevo, llega un momentu que yá nun podemos ver l’azucre, ¡eslleióse! Ye lu mesmu qu’asocede coles acuareles, los pigmentos eslleinse n’agua perfeutamente hasta que vemos l’amiestu como un tou. Y si esos amiestos de pigmentos y agua entemecense con otros vuelven eslleise, formando colores nuevos.
Pero claro… agora que tenemos estos colores tan guapos ¡podríamos crear daqué con ellos! Al pintar sobro distintos materiales asoceden nuevamente coses estrañes… Esisten materiales que paecen “cuspir” les acuareles, ente qu’otros… ¡tráganlas! Esto asocede porque cada material tien distintu grau d’absorción. Los materiales bien absorbentes, aquellos que “traguen” les acuareles, son permeables porque dexen pasar l’agua, mientres que los que nun les absuerben, nun dexen pasar l’agua, son impermeables ¿Suénavos esta pallabra? Impermeable… ¡Ye como llamamos a dellos chubasqueros! ¿Por qué se llamarán asina? ¡Claro! Asocéde-y lo mesmo qu’a los nuesos materiales, nun dexen pasar l’agua, nesti casu l’agua la lluvia… ¿Conoces más materiales impermeables?
Tamién asoceden otres coses bien sorprendentes. Por casu, cuando echamos munches gotinas d’acuareles nun material poco absorbente, podemos ver como se forma una gota bien grande y abombada, que si tocamos o echamos más gotinas espárnase… ¿qué interesante verdá? Débese a la tensión superficial, un especie de “capina” que s’atopa sobro l’agua. Y esta capina ye bien chula, ente otres coses fai que… ¡los zapateros puedan caminar sobro l’agua!
Colores a la carrera: cromatografía
En xugando y esperimentando cola actividá d’Amiestos de colores, pudimos comprobar que al xuntar ciertos colores ¡apaecen otros! Pero… ¿podríamos consiguir el procesu inversu? ¿Podríamos dixebrar los colores naquellos que los componen?
Güei vamos conocer una téunica de separación d’amiestos que va poner a distintos colores n’una carrera, la cromatografía ¿Cuál va ganar?, ¿cuál va ser más lentu?
Acompáñanos n’esta actividá científica y artística
¿Qué precisamos?
Del sobre…
- Filtros de llaboratoriu
Y amás…
- Tisories
- Rotuladores
- Un vasu pequeñín con agua
- Papel absorbente
¿Qué ta pasando?
La cromatografía ye una téunica analítica que s’utiliza enforma nos llaboratorios de química para dixebrar ya identificar sustances. Para poder faer una cromatografía precisamos: una fase estacionaria (nel nuesu casu, papel de filtru) y una fase móvil (l’agua que va tresportar la tinta del rotulador).
Pero, ¿por qué l’agua muévese al traviés del papel? ¿Qué la emburria? L’agua tien una capacidá llamada capilaridá, que-y dexa xubir en contra de la gravedá por pequenos tubinos o capilares, nel nuesu casu los poros del papel “actúen” como tubos capilares. Esta capacidá ye la que fai posible que les plantes tresporten agua dende los raigaños a les fueyes o que, nel nuesu casu, xuba dende’l vasu hasta’l cantu del filtru.
Pero…¡tovía nun tenemos claro por qué el colores dixébrense! Les tintes de los rotuladores tán formaos por unu amiestu de pigmentos, más o menos complexu dependiendo de el color del rotulador. Caún d’esos pigmentos ye un compuestu químicu, cola so estructura (forma) y tamañu distintos a otros. Eses diferencies qu’hai ente unos y otros pigmentos, faen que se muevan a distintes velocidaes al traviés del papel y… que s’acaben dixebrando.
La Universidad para peques/ Universidá pa guah.es / Children’s University ye un proyeutu de la Universidá d’Uviéu, que cunta cola collaboración de la Fundación Española para la Ciencia y la Tecnología – Ministerio de Ciencia e Innovación, Caja Rural de Asturias, Banco Santander, Grupo Hunosa, Ayuntamiento de Siero, APADAC, Pridental, Cluster TIC Asturias, DXC Technology, Lacera e ITVasa.
